वरवंडीत बिबट्याच्या हल्ल्यात चार वर्षीय मुलगी ठार
वरवंडीच्या माजी सरपंचाच्या मुलीचा बिबट्याने नरडीचा घोट घेतला
नरभक्षक बिबट्यास जेरबंद करण्याची वनविभागाकडे मागणी
राहुरी : तालुक्यातील वरवंडी येथिल शेतकरी कुटुंबातील चार वर्षाची वेदिका श्रीकांत ढगे हि घरासमोरील अंगणात खेळत असताना गिन्नी गवतात दबा धरुन बसलेल्या बिबट्याने अचानक वेदिकावर झडप मारली. हल्ला करून जखमी केले वेदिकेला नगर येथे उपचारासाठी दाखल करण्यात आले.परंतू उपचारापुर्वीच तिचा मृत्यू झाल्याचे येथिल डाॅक्टरानी घोषित केले आहे.हि घटना वरवंडी गावाचे माजी सरपंच श्रीकांत रावसाहेब ढगे यांच्या वस्तीवर घडली . याबाबत सविस्तर माहिती अशी की, राहुरी तालुक्यातील वरवंडी येथिल माजी सरपंच श्रीकांत रावसाहेब ढगे या शेतकरी कुटुंबातील चार वर्षीय मुलगी वेदिका श्रीकांत ढगे सकाळी पावणे आठच्या सुमारास अंगणात खेळत होती.गिन्नी गवतात बिबट्या दबा धरुन बसलेला होता. बिबट्याने अचानक हल्ला केला. यावेळी घरातील सर्वांनीच आरडाओरडा केला त्यामुळे बिबट्याने पलायन केले. मात्र बिबट्याच्या हल्ल्यात चार वर्षीय मुलगी गंभीररीत्या जखमी झाली. कुटुंबीयांनी व आजूबाजूच्या लोकांनी तात्काळ तिला उपचारासाठी हॉस्पिटलमध्ये नेले.उपचारापुर्वीच तिचा दुर्दैवी मृत्यू झाला . राहुरीचे पोलीस निरीक्षक संजय ठेंगे व त्यांचे सहकारी व वनविभागाचे वनक्षेत्रपाल युवराज पाचारणे , वनरक्षक सतीश जाधव , गाडेकर आदी कर्मचारी घटनास्थळी दाखल झाले .राहुरी तालुक्यातील कृषिविद्यापीठ, मुळानगर, बाभुळगाव,बारागाव नांदुर, आदि भागांत मानवी वस्त्यांवर बिबट्यांची वर्दळ वाढलेली आहे. शेजारील राहता, श्रीरामपूर तालुक्यात मानवी वस्त्यांवर बिबट्यांची वर्दळ वाढलेली आहे. वरवंडी सारख्या ठिकाणी बिबट्याचे हल्ल्यात बालिकेचा मृत्यू झाल्याची घटना घडल्याने ग्रामीण वरवंडी परिसरात शोककळा पसरली असून या घटनेने तालुक्यात खळबळ उडाली आहे तसेच या भागात भीतीचे वातावरण पसरले आहे.वरवंडी भागात नरभक्षक बिबट्यास पकडण्यासाठी पिंजरा लावण्याची मागणी स्थानिक रहिवाशांनी केली आहे.
News Today 24 साठी राजेंद्र उंडे राहुरी
